فێستیڤاڵی شانۆی کەرکوک ئاڵۆزیی تێکەوت و ڕێگری لە میوانەکانی وڵاتانی دراوسێ کراوە چالاکییەکانیان ئەنجامبدەن.
پەیامنێری تۆڕی میدیایی ئێستا لە كەركوك رایگەیاند، بڕیاربوو ئەمڕۆ شەممە فێستیڤاڵی شانۆی کەرکوک لە سەنتەری رۆشنبیریی کەرکوک بەڕێوەبچێت و چەندین گرووپی شانۆکار و هونەرمەندی شارەکە و وڵاتان تیایدا بەشداربن، “بەڵام ڕێگریکرا لەوەی ئەو هونەرمەندانەی خەڵكی وڵاتانی دراوسێن بێنە کەرکوک”.
بەپێی زانیارییەکانی تۆڕی میدیایی ئێستا، بەهۆی ئەوەی میوانەکان مافی مانەوەی عێراقییان نەبووە و تەنها ئیقامەی هەرێمی کوردستانیان هەبووە، لە لایەن ئیدارەی پارێزگای كەركوك و حکومەتی عێراقەوە رێگریکراوە لەوەی بچنە کەرکوک و شانۆگەرییەکانیان نمایشبكەن.
پەیامنێری ئێستا لە زاری رێكخەرانی فێستیڤاڵەكەوە دەڵێت، گۆڕانکاری لە فێستیڤاڵەكەدا کراوە و ئەو شانۆکار و هونەرمەندانەی لە وڵاتەکانی دراوسێوە هاتوون، دەتوانن لە چەمچەماڵ و قەرەهەنجیر چالاکییەکانیان ئەنجامبدەن.
