بەڕێوەبەرایەتیی تەندروستیی هەڵەبجە بڵاویكردووەتەوە، جۆرێك نوقڵ لە ماركێتەكاندا دەستیبەسەردا گیرا كە لە شێوەی جگەرە دروستكراوە و بە منداڵان فرۆشراوە، هاوكات ڕێوشوێنی یاسایی بەرامبەر ئەو كەسانەش دەیگرێتەبەر كە هێناویانەتە شارەكەوە.
بەپێی ڕاگەیەندراوێكی بەڕێوەبەرایەتیی تەندروستیی هەڵەبجە كە وێنەیەكی دەست تۆڕی میدیایی ئێستا كەوتووە و تێدا هاتووە، دوای ئەوەی ئاگاداركراینەوە لە بوونی جۆرێك نوقڵ لە ماركێتەكاندا كە لە شێوەی جگەرەدا دروستكرابوو و بە ڕێگای قاچاغ هێندراوەتە شارەكە و دەستبەجێ و هەر ئەمشەو بەڕێوەبەری خۆپاراستنی تەندروستی و لێپرسراوی چاودێری و سەلامەتی خۆراك سەردانی چەند شوێنێكی گومانلێكراویان كرد و دەستیانگرت بەسەر بڕێكی زۆر لەو كاڵایەدا و سزای ئەو كەسانەش دەدرێت كە ئەو كاڵایەیان هێناوەتە ناو شاری هەڵەبجەوە.
لە ڕاگەیەندراوەكەدا هاتووە، “پێویستە باوكان دایكان زیاتر ئاگاداری منداڵەكانیان بن و لەهەر جێگایەك هەر شتێكی گومانلێكراویان بینی دەست بەجێ تیمەكانمان ئاگاداربكەنەوە”.
