یەکێتیی نیشتیمانی کوردستان لە پێنجەمین ساڵڕۆژی کۆچی دوایی مام جەلالدا پەیامێکی بڵاوکردەوە و لەبەشێکیدا ڕایگەیاند، ئەمڕۆ لە هەموو ڕۆژێك زیاتر یەكێتیەكەمان، گەلەكەمان و رێبازی دیموكراسی ناوچەكە و عێراق بەتایبەتی، پێویستی بە حیكمەت و ئەزموون و دونیابینیی سەرۆك مام جەلالە كە لە ڕێگەوە سوود لە حیكمەت و ڕێبازی چەپكە گوڵەكە و پێكەوەژیان ببینین بۆ دەرچوون لە بەربەست و قەیرانەكان.
ئەمڕۆ یەکشەممە، یەکێتیی نیشتیمانی کوردستان لە پەیامێکدا ڕایگەیاند، ” پێنج ساڵ لەمەوبەر، گەلی كوردستان و سەرجەم عیراقییەكان، پرۆسەی دیموكراسی و ئاشتی و پێكەوە ژیان لەوڵاتەكەمان ڕابەرێكی هەڵكەوتوو و تێكۆشەر و پێشمەرگەی زیاتر لە نیو سەدە خەباتی ڕزگاریخوازی و دیموكراسیان لە دەستدا”.
ئاماژەی بەوەشکرد، “ئەزموونی چەندین ساڵەی سەرۆك مامجەلال لە خەباتی دیپلۆماتیدا، لە مێژووی كوردایەتی ھاوچەرخ و هەتا خەباتی ئازادیخوازانەی گەلانی ناوچەكەدا وێنەیەكی دەگمەنی پەیوەندییەكان بوو لە ئاستی میللەتانی رۆژھەڵات و رۆژئاوادا و بناغەی پتەویی ئەو دەستكەوتە دیپلۆماتیانە، رەوایی و رەسەنایەتی مەسەلەی كوردی لە رۆژھەڵاتی ناوەڕاستدا دووپاتدەكردەوە”.
دەقی پەیامەکەی یەکێتیی نیشتیمانی کوردستان:
پێنج ساڵ لەمەوبەر ، گەلی كوردستان و سەرجەم عیراقییەكان، پرۆسەی دیموكراسی و ئاشتی و پێكەوەژیان لەوڵاتەكەمان ڕابەرێكی هەڵكەوتوو و تێكۆشەر و پێشمەرگەی زیاتر لە نیو سەدە خەباتی ڕزگاریخوازی و دیموكراسیان لە دەست دا ،عیراقی دیموكرات و فیدرالیش یەكەمین سەركۆماری هەڵبژێردراویان بەرەو كاروانی جاویدانی و نەمری بەرێكرد..
سەرۆك مام جەلال لە ماوەی زیاتر لە شەست ساڵی بێوچان خەباتی ھەمەلایەنەی كرد بۆ سەلماندن و بەدیهێنانی مافە ڕەوا نەتەوەیی و دیموكراسیەكانی گەلی كورد و پیادەكردنی بژاردەی دیموكراسی و دادپەروەری و پێكەوە ژیان لە عێراقدا.
ئەزموونی چەندین ساڵەی سەرۆك مامجەلال لە خەباتی دیپلۆماتیدا، لە مێژووی كوردایەتی ھاوچەرخ و هەتا خەباتی ئازادیخوازانەی گەلانی ناوچەكەدا وێنەیەكی دەگمەنی پەیوەندییەكان بوو لە ئاستی میللەتانی رۆژھەڵات و رۆژئاوادا و بناغەی پتەویی ئەو دەستكەوتە دیپلۆماتیانە ، رەوایی و رەسەنایەتی مەسەلەی كوردی لە رۆژھەڵاتی ناوەڕاستدا دووپات دەكردەوە.
لە دوا وێستگەی ژیانی سیاسیشیدا سەرۆك مام جەلال لە پێگەی پارێزەری دەستوورەوە هەمیشە خاڵی كۆكەرەو و ڕاگرتنی هاوسەنگی بوو، هەڵبەتە ئەمرۆش دوای ساڵێك لە هەڵبژاردنەكانی پەرلەمانی عێراق و هەلومەرجی چەقبەستنی پرۆسەی سیاسی لە بەغدا و لە هەرێمی كوردستانیش، زیاتر لە هەر كاتێكی تر دروستی دنیابینی سەرۆك مام جەلال لەسەر بنەماكانی تەوافق و شەراكەت و هەماهەنگی نێوان هێز و لایەنە سیاسییەكان دووپات دەبێتەوە و پێویستە ئەو بنەمایانە ببنە رێنوێنی تێپەڕاندنی قەیرانەكان بۆ چارەسەری كێشەكانی وڵات و پێكهێنانی حكومەتێكی كارا كە ئەولەویەتی خزمەتكردنی هاووڵاتیان و باشكردنی ژیان و گوزەرانیان بێت. هەر ئەمڕۆش یەكێتی نیشتمانی كوردستان بە سەرۆكایەتی هەڤاڵ بافڵ جەلال تاڵەبانی دەستپێشخەر و داكۆكیكاری سەرسەختی ئەو پرەنسیبی سازان و پێكەوەییە.
لەساڵرۆژی ماڵئاوایی سەرۆكی نەمر مام جەلال دا ئەوە بە بیر هەموو لایەك دەهێنینەوە كە ئەمڕۆ لە هەموو رۆژێك زیاتر یەكێتیەكەمان، گەلەكەمان و رێبازی دیموكراسی ناوچەكە و عێراق بەتایبەتی، پێویستی بە حیكمەت و ئەزموون و دونیابینی سەرۆك مام جەلالە كە لە رێگەوە سود لە حیكمەت و رێبازی چەپكەگوڵەكە و پێكەوەژیان ببینین بۆ دەرچوون لە بەربەست و قەیرانەكان، چونكە رێبازو دونیابینی مام كەلتورێكی سیاسی و میراتێكی شۆرشگێرانەی دەوڵەمەندە و هەموو لایەك دەتوانن دەرس و وانەی لێ وەر بگرن.
سڵاو لە رۆحی پاكی سەرۆك مام جەلال
قامەتی مێژوو و ستوونی پتەوی نیشتمان پەروەری
نەمری بۆ هەموو شەهیدانی یەكێتی و گەلی كوردستان
مەكتەبی سیاسیی
یەكێتیی نیستیمانیی كوردستان
