شانەی ڕاگەیاندنی ئەمنی ڕایدەگەیەنێت، 50 ئەندامی سەر بە داعش-ی لەلایەن هێزەكانی سوریای دیموكراتەوە ڕادەستكراوە.
شانەی ڕاگەیاندن لە ڕاگەیەندراوێكدا ئاشكرایكرد، پڕۆسەكە لەڕێی دەروازەی ڕەبیعەی سنووری لە باكووری وڵات ئەنجامدراوە لەڕێی “لێكتێگەیشتن و ڕێككەوتنی هاوبەش” لەگەڵ هێزەكانی سوریای دیموكرات.
ئەوەشی خستەڕوو، ئەندامەكانی داعش ڕادەستی “ئاژانسی هەواڵگری و لێكۆڵینەوەی فیدراڵی لە وەزارەتی ناوخۆ كراون بەمەبەستی لێكۆڵینەوە لەگەڵیان و، گرتنەبەری ڕێوشوێنی یاسایی پێویست لەگەڵیاندا”.
ئەمە جاری یەكەم نییە عێراق ژمارەیەك لە ئەندامانی دەستگیركراوی داعش لە هێزەكانی سوریای دیموكرات وەربگرێت، دوای ئەوەی لە شوباتی 2019، 280 ئەندامی دیكەی ڕێكخراوەكەی ڕادەستكرا.
پێشتر ئاژانسی ڕۆیتەرز بڵاویكردەوە، ڕێككەوتنی ڕادەستكردنی چەكدارەكانی پێشووی داعش نزیكەی 500 كەس دەگرێتەوە كە لەلایەن هێزەكانی سوریای دیموكرات لە ڕۆژئاوای كوردستان دەستبەسەرن.
