خوشكی ئەو كوڕەی هەفتەی ڕابردوو ڕووبەڕووی هێزە ئەمنییەكان لە بازگەیەكی قەزای قەرەداغ بووەوە، تەقەی لە بینای دادگای سەیدسادق كردووە و لەلایەن هێزە ئەمنییەكانەوە دەستگیركراوە.
دیاری ڕەفیق، قائیمقامی قەزای سەیدسادق لە لێدوانێكدا بە تۆڕی میدیایی ئێستای ڕاگەیاند، ئەو كوڕەی هەفتەی ڕابردوو ڕووبەڕووی هێزە ئەمنییەكان بووەوە لە بازگەیەكی قەزای قەرەداغ، خوشكەكەشی تەقەی لە بینای دادگای سەیدسادق كردووە و لەلایەن هێزە ئەمنییەكانەوە دەستگیركراوە.
ئاماژەی بۆ ئەوەش كرد، لەلایەن هێزە ئەمنییەكانەوە دەستبەسەر كراوە و لێكۆڵینەوەی لەگەڵدا دەكرێـت.
هەفتەی ڕابردوو، كەسێك بە ماتۆرسكیل ویستوویەتی بە بازگەیەكی قەرەداغدا تێپەڕێت كە هێزە ئەمنییەكان داوایان لێكردبوو بووەستێت و ناسنامەكەی بدات، بەڵام ڕووبەڕووی هێزە ئەمنییەكان بووەوە و بەهۆیەوە حەوت كەس لە هێزە ئەمنییەكان و هاوڵاتییەكیش برینداربوو تۆمەتبارەكەش كوژرا.
