وەفا عەباس هەشت ساڵ لەناو چەکدارانی داعش و کڕین و فرۆشتندا بووە، ئەو لەگەڵ خوشکەکەیدا لەلایەن داعشەوە ڕفێندراوە و لەناو ئەو ڕێکخراوەدا ژیاوە.
وەفا عەباس، چرکەساتەکانی داگیرکردنی گوندی کۆجۆی ناوچەی شەنگال لەلایەن داعشەوە دەگێڕێتەوە لە ساڵی 2014، دەڵێت، لەگەڵ خێزانەکەمدا دەژیام کاتێک داعش هات و منیان لەگەڵ ژمارەیەکی دیکە لە منداڵ و ژن ڕفاند، لەگەڵ وەفا خوشکێکیشی ڕفێندراوە کە نابیستە و ناشتوانێت قسە بکەت.
وەفا دەڵێت، دوای ڕفاندنیان کڕین و فرۆشتنیان پێوەکراوە و دەستدرێژی کراوەتە سەریان.
وەفا ئێستا تەمەنی 18 ساڵی تەواوە، ئەو کاتەی ڕفێندراوە تەمەنی 10 ساڵ بووە و باسی کاتی ڕفاندنەکەی دەکات، “بردمیان بۆ باخێک لە شاری موسڵ، دواتر بۆ شاری ڕەقە لە سوریا، لەوێ هەر داعشێک ئەو ژنەی دڵی بیویستایە هەڵیدەبژاردن و دەستدرێژیی دەکردەسەری یان دەیفرۆشت، منیان فرۆشت بە خێزانێک بۆ ماوەی یەک مانگ، دواتر فرۆشرام بە خێزانێکی دیکە و دوای تا کاتێک هاوسەرگیریم لەگەڵ ئەبو ئەحمەد کرد”.
وەفا دەڵێت، “ئەبو ئەحمەد یەکێک بوو لە سەرکردەکانی داعش و لە پەنجاکانی تەمەنیدا بوو، بۆ ماوەی حەوت مانگ هاوسەری ئەوبووم”.
خوشکەکەی وەفا لە هەمان کاتدا ڕفێندراوە لەلایەن داعشەوە، بەڵام لەیەکتری جیاکراونەتەوە و ئەویش بەهەمانشێوە کڕین و فرۆشتنی پێوەکراوە، بەڵام وەفا دەڵێت، لەوکاتەوە تا ئێستا هیچ زانیارییەکی لەبارەی خوشکەکەیەوە نییە.
لە ساڵی 2014 داعش بەشێوەیەکی لەناکاو موسڵ و شەنگال و بەشێک لە ناوچەکانی دیکەی داگیرکرد، لە شەنگال هەزاران کوردی ئێزدی ڕووبەڕووی کوشتن، برینداربوون و ڕفاندن بوونەوە، تائێستاش ژمارەیەکی زۆر ئێزدی بێسەروشوێنن.
