حەوت وڵاتی جیهان كە یەكێكیان دراوسێی هەرێمی كوردستان و عێراقە، دەتوانیت پاسپۆرتەكانیان بكڕیت.
هەریەك لە دۆمینیكان، توركیا، سەینت كیتس و نێڤیس، سەینت لوسیا، ئەنتیگوا و بەربودا، مۆنتینیگرۆ و گرینادا بە شێوازی جیاواز پاسپۆرت و تەنانەت بەشێكیان ڕەگەزنامە دەدەن بە كەسانی بیانی لە بەرامبەر پارەدا.
شێوازی پارەدانەكان جۆراوجۆرن، بریتین لە كڕینی خانوبەرە، وەبەرهێنان و ئۆفەری كەسانی دەستەبژێر كە ئەمەیان تایبەتە بە سەرمایەدارەكان و دەتوانن ڕاستەوخۆ ڕەگەزنامە و پاسپۆرتی وڵاتەكە بە كاش بكڕن.
وڵاتێكی وەكو توركیا، لە ڕێگەی پرۆگرامی ڕەگەزنامەوە، دەرگای بەخشینی ڕەگەزنامەی بەڕووی وەبەرهێنەرانی بیانیدا كردووەتەوە، مەرجی حكومەتی توركیا ئەوەیە وەبەرهێن بە لایەنی كەمەوە 250 هەزار دۆلاری ئەمریكی ببەخشێت و لە ماوەی شەش بۆ نۆ مانگدا دەبێت بە خاوەنی ڕەگەزنامە و پاسپۆرتی توركی.
یەكێك لە تایبەتمەندییەكانی ئەو پاسپۆرتەی توركیا دەیدات بە كەسانی بیانی و وەبەرهێنەران یاخود ئەوانەی خانوبەرەی گرانبەها لەو وڵاتە دەكڕن، ئەوەیە دەتوانن بەبێ ڤیزا گەشت بۆ 111 وڵات بكەن.
پێنج لەو شەش وڵاتەی دیكەش هاوشێوەی توركیا لە بەرامبەر سەرمایەگوزاریدا ڕەگەزنامە و پاسپۆرت دەدەن بە بیانییەكان، بەڵام سەیرترینیان مۆنتینیگرۆیە لە خۆرهەڵاتی ئەوروپا، كە تەنها مەرجی وەرگرتنی پاسپۆرت و ڕەگەزنامە، گەیشتنتە بە خاكی ئەو وڵاتە.
