ماددەیەكی كیمیایی پێدەچێت ببێتە ڕێگر لە بەردەم هەڵوەرینی قژ و چارەسەرێك بێت بۆ ڕووتانەوەی سەر، وەك زانایان ئاشكرایانكردووە.
تیمێك لە زانایانی زیندەزانی لە زانكۆی كاڵیفۆرنیای ئەمریكا، توێژینەوەیەكیان لەبارەی ڕێگەكانی ڕێگریكردن لە كەچەڵبوون كردووە و دەڵێن، ماددەیەكی كیمیاییان دۆزیوەتەوە كە دەبێتە كلیلی چارەسەری هێشتنەوەی سەلكی مووەكان بە زیندوویی و بەرگرتن لە مردنیان.
كیشوان وانگ سەرپەرشتیاری توێژینەوەكە ڕایگەیاند، پرۆتینێك بە ناوی “TGF-beta” دابەشبوونی خانەكانی سەلكی مووەكان و مردنیان ڕێكدەخات، دەكرێت بە دەستكاریكردنی بڕی ئەو ماددە كیمیاییە مردنی سەلكی موو ڕابگیرێت.
توێژەرەكە جەختدەكاتەوە كە ئەو پرۆتینە دوو ئەركی هەیە، كۆنترۆڵكردنی پرۆسەی دابەشبوونی خانەكان لە سەلكی موودا، هەروەها دروستكردنی خانەی نوێ كە دەرئەنجامی هەردووكیان مردنی سەلكی مووە بە شێوەی یەكجارەكی و بەوەش مووەكانی سەری مرۆڤ كەمدەبنەوە و بەرەو كەچەڵبوونی دەبەن.
كیشوان وانگ پێیوایە زیادكردنی ڕژانی پرۆتینی “TGF-beta” لە سەلكی موودا، ڕێگردەبێت لە مردنی سەلكی مووەكان و قژ بە پڕی دەهێڵێتەوە و ئاماژە بۆ ئەوە دەكات كە كار لەسەر ئەو پرۆسەیە دەكەن، بەبێ ئەوەی وردەكارییەكەی و چۆنێتیی ئەنجامدانی كارەكە ئاشكرابكات.
