بەپێی ڕاگەیەندراوێكی نووسینگەی مستەفا كازمی سەرۆك وەزیرانی عێراق ئەمڕۆ شەممە، كۆبوونەوەی لوتكەی جەدە تایبەت بە پرسەكانی ئاسایش وزە و پەرەپێدان بە بەشداریی عێراق، ئەمریكا، وڵاتانی كەنداو و چەند وڵاتێكی دیكەی عەرەبی بەرێوەچوو و تێیدا مستەفا كازمی وتارێكی پێشكەشكردووە و ڕایگەیاند، بە هاوكاریی وڵاتان، عێراق بەسەر تیرۆردا سەركەوت وتیشی،” سەرباری قەیران و ئاستەنگەكان ِڕۆڵی گەورەمان لە تێكشكاندنی تیرۆر لە ناوچەكەدا هەبووە”.
لە ڕاگەیەندراوەكەدا هاتووە، ” بۆ زیاتر پێكەوەكاركردنی هاوبەش لەگەڵ وڵاتانی ناوچەكە كارمانكردووە و دەمانەوێت هاوئاهەنگیی زیاترمان هەبێت.”
ئاماژە بەوەشكرد، “جەنگی ئۆكرانیا كاریگەری و لێكەوتەی لەسەر وڵاتانی ناوچەكە هەبووە پێویستە هەمووان لە چارەسەكردنی ڕۆڵمان لە ئاشتەوایی نێوان ئۆكرانیا و ڕوسیادا هەبێت”.
هەر لە ڕاگەیەندراوەكەدا هاتووە، مستەفا كازمی لە كۆبوونەوەكەدا مەترسییەكانی گۆڕانكارییەكانی كەشوهەوای خستووەتەڕوو، هاوكات مەترسیییەكانی سەرهەڵدانی قەیرانی ئاوی ئاشكراكردووە و جەختی لە هەماهەنگی و كاركردنی هاوبەش كردووەتەوە.
مستەفا كازمی باسی لە هەنگاوەكانی پێكهێنانی حكومەتی نوێی عێراق كرد و ڕایگەیاند، “پێویستە ڕێز لە دیموكراسی عێراق و سەربەخۆیی بگیرێت”.
