بەڕێوەبەرایەتیی پۆلیسی هەولێر وردەكاریی شەڕەچەقۆكەی ئەمڕۆی بەردەم نەخۆشخانەی فریاكەوتنی ڕۆژئاوای ئاشكراكرد و دەڵێت، لەسەر شوێنی ئاوفرۆشتن شەڕەكە دروستبووە.
بەپێی ڕاگەیەندراوێكی پۆلیسی هەولێر، دوای ئاگاداركردنەوەی بەشی پۆلیسی فریاکەوتنی هەولێر كە لە بەردەم نەخۆشخانەی فریاکەوتنی (ڕۆژئاوا) شەڕ لە نێوان چەند کەسێک ڕوویداوە، دەستبەجێ گەیشتنە شوێنی ڕووداوكە و دەرکەوت کە چەند کاسبکارێک لەسەر شوێنی کارکردن بووەتە شەڕیان و لە ئەنجامدا شەش کەس بە چەقۆ بریندارببوون.
باسی لەوەشكردووە، بریندارەکان گەیەندرانە نەخۆشخانە و چەند کەسێکیش بە تۆمەتی تێوەگلان لەو شەڕە، دەستگیرکران و ڕێڕەوی یاسایی بەرامبەریان گیرایەبەر.
