تێلێسکۆپی ئاسمانیی جەیمس وێب لە بۆشایی ئاسماندا تووشی ڕووداوێک بووە و تیرەستێرە (نەیزەک)ـێکی بچوک خۆیپێداکێشاوە، بەم هۆیەشەوە زیان بە ئاوێنە سەرەکییەکەی گەیشتووە.
ئاژانسی ناسا ڕوونیکردووەتەوە، ئەم ڕووداوە لە نێوان 23 و 25ـی مانگی پێشوودا بووە، بەڵام تێلێسکۆپەکە ئێستا لەکاردایە و لەڕووی تواناوە هێشتا باشترە لە چاوەڕوانییەکانی ئاژانسەکە، بۆیە دەتوانێت ئەرکی خۆی بەجێبگەیەنێت.
تێلێسکۆپی جەیمس وێب کە پڕۆژەیەکی نێودەوڵەتییە بە بەهای 10 ملیار دۆلار، لە کۆتایی ساڵی ڕابردوودا بە سەرکەوتوویی ڕەوانەی بۆشایی ئاسمان کرا و لە ئێستادا، وێب یەک ملیۆن و نیو کیلۆمەتر لە زەوییەوە دوورە.
