ئەو زنجیرە خواردنگەیەی پێشتر “ماکدۆناڵد”ـی ڕوسیا بوو، لۆگۆی نوێی خۆی بڵاودەکاتەوە و بڕیارە لە یەکشەممەوە دەسبەکار ببێت.
شێوازی نوێی لۆگۆکە ڕووکارێکی سەوزی هەیە، بە ڕەنگی پرتەقاڵی بازنەیەک و دوو هێڵی تێدایە و دەگوترێت ئاماژەن بە هەمبەرگرێک و دوو قاژ پەتاتەی “فینگەر”.
کۆمپانیاکە هێشتا ناوی خۆی ڕانەگەیاندووە، بەڵام دەگوترێت چەند بژاردەیەکی لە بەردەمدایە و دەکرێت هەڵیانبژێرێت.
بەپێی ئاژانسی “تاس”ـی ڕوسی، کۆمپانیای “Sistema PBO” کە بەڕێوەبردنی زنجیرەی خواردنگەکانی گرتووەتەدەست، ڕایگەیاندووە، “ڕووکاری سەوزی لۆگۆکەمان ئاماژەیە بەو ئاستە بەرزەی بەرهەم و خزمەتگوزارییەکان کە میوانەکانمان پێی ڕاهاتوون”.
لە مانگی پێشوودا زنجیرەی خواردنگەکانی ماکدۆناڵد ڕایگەیاندبوو، بەهۆی جەنگی ئۆکرانیاوە چیدی لە ڕوسیا کارناکات.
