ئۆلێگ پرۆدکی، بۆکسێنەری ئۆکرانی کە لە پاڵەوانێتییە نا پرۆفیشناڵەکاندا نوێنەرایەتی ئۆکرانیای دەکرد، بەهۆی بۆردوومانی سوپای ڕوسیاوە گیانی لەدەستدا.
پرۆدکی لە هێڵی پێشەوەی شەڕی نێوان وڵاتەکەی و ڕوسیا وەک پلەدارێکی سوپای ئۆکرانیا بەشدار بوو، بە بەرگی سەربازییەوە بەرگری لە وڵاتەکەی کردووە دژی لەشکرکێشی ڕوسیا.
بۆکسێنەرەکە تەمەنی 30 ساڵ بووە و لە دەستپێکی جەنگەوە پەیوەندی بە هێزە تایبەتەکانی پۆلیسی چێرکاسی-یەوە کردووە، دوێنێ (سێشەممە)، فیدراسیۆنی بۆسکێنی ئۆکرانیا بەفەرمی گیان لەدەستدانی ئەو وەرزشکارە و چوار سەربازی دیکەی ڕاگەیاند.
فیدراسیۆنی بۆکسێنی ئۆکرانیا ڕاگەیەنراوێکی بڵاوکردووەتەوە و تێیدا هاتووە، “بەداخەوە ئاگادارتان دەکەینەوە، کە ئۆلیگ پرۆدکی پاڵەوانی ناوخۆیی بۆکسێنی ئۆکرانیا لە جەنگی دژ بە داگیرکەرانی ڕوسیادا کوژراوە”.
پرۆدکی ئەندامی تیپی ئۆتامانسی ئۆکرانی و دوو جار پاڵەوانی خولی یاریزانە نا پرۆفیشناڵەکانی ئۆکرانیا بووە، لە چەندین پاڵەوانێتی نێودەوڵەتیدا لە کێشی سووکدا لەژێر ئاڵای زەرد و شینی وڵاتەکەیدا بەشداری کردووە.
