هەیسەم جبوری ڕاوێژکاری مستەفا کازمی سەرۆک وەزیرانی عێراق جێبەجێکردنی بڕیاری دادگای فیدراڵی سەبارەت بە کەرتی نەوت و گازی هەرێمی کوردستان بە پێویست دادەنێت، ڕاشیگەیاندووە، هەرێم هیچ ڕێگا و بژاردەیەکی دیکەی نییە جگە لە جێبەجێکردنی بڕیارەکە.
میدیا عێراقییەکان لەزاری هەیسەم جبورییەوە بڵاویانکردەوە، بڕیارەکەی دادگای فیدراڵی پشتبەستە بە دەستوور و یاسا بۆیە پێویستە لەسەر هەرێمی کوردستان و سەرجەم لایەنەکان جێبەجێیبکەن.
ئاماژەی بەوەشکردووە، هیچ بژاردە و ڕێگایەک لەبەردەم حکومەتی عێراق و هەرێمی کوردستان نییە جگە لە جێبەجێکردنی بڕیارەکەی دادگای فیدراڵی.
باسی لەوەکردووە، کە دەکرێت لەڕێگەی یاسای نەوت و گازەوە حکومەتی فیدراڵ و هەرێم بگەنە چارەسەری پێویست بەتایبەت کە ئێستا دەرچوواندنی ئەو یاسایە پێویستییەکی گرنگە، جەختیکردەوە ناگونجێت و ناکرێت یاسای بودجە پەسەندبکرێت بەبێ جێبەجێکردنی بڕیارەکەی دادگای فیدراڵی.
پێشتریش ئیحسان عەبدولجەبار، وەزیری نەوتی عێراق لەبارەی بڕیارەکەی دادگای فیدراڵییەوە جەختیکردەوە، بڕیارەکە وەکخۆی جێبەجێدەکەن و ڕایگەیاند، بەغداد نایەوێت پرسی نەوت قۆرغبكات، بەڵكو دەیەوێت لەبەرژەوەندیی هەموو لایەكدا بێت و پێشتر دەستپێشخەرییمان بۆ هەرێمی كوردستان كردووە و نەرمی زۆرمان نواندووە و هیچ ئەنجامێكی نەبووە.
وتیشی، “بەرەو ئەوە دەچین بڕیارەكەی دادگای فیدراڵی جێبەجێبكرێت، چونكە داهاتی نەوتی فرۆشراوی هەرێمی كوردستان یەكسان نییە بە 50%ی بەهاكەی”.
