“كونسوڵی هیندستان سەردانەکەی هەڤاڵ ئەبوبەکری بە سەرکەوتووترین سەردان ناوبرد”

نووسینگەی پارێزگاری سلێمانی دەڵێت، كونسوڵی گشتیی هیندستان لە هەرێمی کوردستان، سەردانەکەی هەڤاڵ ئەبوبەکری بە سەرکەوتووترین سەردان لەنێوان عێراق و هیندستاندا ناوزەدكردووە.

نووسینگەی پارێزگاری سلێمانی ڕایگەیاند، ئەمڕۆ سێشەممە د. هەڤاڵ ئەبوبەکر پارێزگاری سلێمانی لە دیوانی پارێزگادا، پێشوازیکرد لە سوبهاش كەین كونسوڵی گشتیی هیندستان لە هەرێمی کوردستان و شاندێكی هاوڕێی، “کە بەمەبەستی سوپاسکردنی پارێزگاری سلێمانی بۆ سەردانە فەرمییە سەرکەوتووەکەی بۆ وڵاتی هیندستان و پێشکەشکردنی چەند کتێبێک بە زمانی هیندی و ئینگلیزی بە کتێبخانەی ئەدەبیی نێودەوڵەتیی پارێزگای سلێمانی سەردانیان کردبوو”.

بەپێی نووسینگەی پارێزگار، كونسوڵی گشتیی هیندستان، سەردانەکەی هەڤاڵ ئەبوبەکری بە سەرکەوتووترین سەردان لەنێوان عێراق و هیندستاندا ناوزەدكردووە و لە ڕاگەیەندراوێكدا كە لە پەڕەی د. هەڤاڵ ئەبوبەكر لە تۆڕی كۆمەڵایەتیی فەیسبووك بڵاویكردووەتەوە، دەڵێت، “بەڕێزیان سەردانەکەی پارێزگاری سلێمانییان بە سەرکەوتووترین سەردان لەنێوان عێراق و هیندستاندا ناوبرد و پشتیوانیی تەواوی خۆیان بۆ کار و بەرنامە هاوبەشەکانی نێوان پارێزگای سلێمانی و ئەو وڵاتە دەربڕی”.