وتەبێژی وەزارەتی گواستنەوە و گەیاندنی هەرێم ڕایدەگەیەنێت، پێشبینیده‌كرێت کەشوهەوای هەرێم لەم هەفتەیەدا گۆڕانکاریی بەسەردا بێت و لە زۆربەی ناوچەکانی هەرێمی کوردستان باران ببارێت.
دیلان ڕواندزی، وتەبێژی وەزارەتی گواستنەوە و گەیاندن بە فەرمانگەی میدیا و زانیاریی هەرێمی وتووە، “کاریگەریی نزمەپاڵەپەستۆی دەریای سوور بۆ سەر ناوچەکەمان درێژدەبێتەوە و ئەمەش وادەکات لە ماوەی کاریگەریی ئەم نزمەپاڵە پەستۆیە ئاسمانی هەرێم بگۆڕێت بۆ نیمچەهەور و هەوری تەواو”.
باسی لەوەش كردووە، لەگەڵ هاتنی ئەو نزمە پاڵەپەستۆیە پێشبینیده‌كرێت ڕۆژی دووشەممە لە بەشێک له ناوچە جیاجیاکان نمەباران ببارێت و ڕۆژی سێشەممەش کاریگەریی ئەو نزمە پاڵەپەستۆیە زیاتربێت و باران لە زۆربەی ناوچەكان ببارێت.
وتەبێژی وەزارەتی گواستنەوە و گەیاندن پێشبینیكردووە، بارانبارینەكە هەورە تریشقەشی له‌گه‌ڵدا بێت و پلەکانی گەرماش دوو تا چوار پلە نزمببنەوە .
بەوتەی وتەبێژەكەی وەزارەتی گواستنەوە، ڕۆژی چوارشەممە کاریگەریی ئەو نزمە پاڵەپەستۆیە بەردەوام دەبێت و نمەباران دەبارێت و هەندێك کات ئەگەری شەستەباران و لێزمەبارانی کورتخایەن هەیە و خێرایی با هەندێك کات زیاددەکات”.
هەروەها پێشبینی ئەوەشی كردووە، شەوی چوارشەممە لەسەر پێنجشەممە کاریگەریی ئەو نزمە پاڵەپەستۆیە کۆتاییبێت.
