لەكاتێكدا نەوتی هەناردەكراوی مانگی ڕابردووی عێراق 100 ملیۆن بەرمیلی تێپەڕاندووە، دەركەوتووە نەوتی هەناردەكراو كەمتربووە لەو ڕێژەیەی بەپێی ڕێككەوتنی ئۆپیك بۆ عێراق دیاریكراوە.
ئەمڕۆ شەممە ئاژانسی هەواڵی ڕۆیتەرز ئەنجامی بەدواداچوونێكی بڵاوكردەوە و ئاشكرایكرد، 10 وڵاتە ئەندامەكەی ڕێكخراوی ئۆپیك، زۆر كەمتر لەو بڕەی بۆیان دیاریكراوە، نەوت هەناردە دەكەن.
بەپێی بەدواداچوونەكە، مانگی ئازاری ڕابردوو وڵاتانی ئۆپیك بە ڕێژەی 151% كەمتر نەوتیان فرۆشتووە، بەڵام مانگی شوبات 136% بووە.
لە دوو ساڵی ڕابردوودا، وڵاتانی ئۆپیك ڕێككەوتن لەسەر كەمكردنەوەی نەوتی هەناردەكراویان و هەر وڵاتێك بە بڕێكی دیاریكراو، ئەوەش لەپێناو بەرزكردنەوەی نرخی نەوتدا بوو، بەڵام دواتر پشكی هەندێكیان گۆڕانكاری بەسەردا هات و ڕێژەیەكی كەم بۆ نەوتی هەناردەكراویان زیادكرا.
ڕۆیتەرز دەڵێت، “بەپێی ڕێككەوتنی ئۆپیك، عێراق دەیتوانی 44 هەزار بەرمیل نەوتی زیاتر هەناردەبكات، بەڵام 30 هەزاری زیادكردووە و بەوەش ڕۆژانە 14 هەزار بەرمیل نەوتی كەمتری فرۆشتووە.
ئەم هەواڵە لە كاتێكدایە، وەزارەتی نەوتی عێراق ڕایگەیاند، لە مانگی ئازاردا عێراق 100 ملیۆن و 563 هەزار و 999 بەرمیل نەوتی فرۆشتووە، کۆی داهاتی فرۆشتنی نەوتیش لەو مانگەدا گەیشتووەتە 11.7 ملیار دۆلار، ئەوەش بەرزترین داهاتە لە دوای ساڵی 1972ـەوە.
