ئەستێرەی نەرویجی یانەی بوروسیا دۆرتمۆند، ئێرلینگ هالاند بەم نزیکانە لەبارەی داهاتوویەوە بڕیاردەدات، تاوەکو ئێستا یانەکانی ڕیاڵ مەدرید و مانچستەر سیتی نزیکترینن لە گواستنەوەیەوە.
تۆڕی “ئەتلەتیک” ئاشکرایکردووە، هالاند بە هاوکاریی مینۆ ڕایۆلای لێپرسراوی کارەکانی لە ماوەی چەند هەفتەی داهاتوودا بڕیار لە داهاتووی دەدات، ماوەی بڕیاردانیشیان لە دوو هەفتە تێپەڕناکات.
ئەو یانانەش کە نزیکترینن لە گواستنەوەیەوە، یانەکانی مانچستەر سیتی و ڕیاڵ مەدریدن، بەوپێیەی دوو یانەی ناوبراو ئامادەییان دەربڕیوە تێچووی گرێبەستەکەی پێشکەشبکەن کە 200 ملیۆن یورۆیە بە مووچەی ساڵانەیەوە بۆ ماوەی چوار وەرز.
لەلایەکی دیکەوە، چاڤی هێرناندێزی ڕاهێنەری یانەی بەرشلۆنە پەیوەندی بە هێرشبەرەکەوە کردووە، یانە کەتەلۆنییەکەش یەکێکلە لە خوازیارەکانی هالاند و بەدوور نەزانراوە ئیدارەی لاپۆرتا سەرکەوتووبن لە گۆڕینی ئاڕاستەی لە مانچستەر و مەدریدەوە بۆ هەرێمی کەتەلۆنیا.
