لەسەر بڕیاری بافڵ جەلال تاڵەبانی باڵەخانەیەکی مۆدێرن كە پێکدێت لە هۆڵی خوێندن و تاقیگەی زانستیی پێشکەوتوو بۆ خوێندكارانی زانكۆ لە خانەقین دروستدەكرێت.
نووسینگەی ڕۆژنامەوانی بافڵ جەلال تاڵەبانی بڵاویكردەوە، لەمیانی هەوڵەکانی بۆ بەرەوپێشچوونی ڕەوتی خوێندن و ئاستی زانستیی زانکۆکانی هەرێمی کوردستان و ڕەخساندنی زەمینەیەکی لەبار بۆ خوێندکاران و گەنجان، بافڵ جەلال تاڵەبانی بڕیاریدا بە دروستکردنی باڵەخانەیەکی مۆدێرن بۆ کەمپەسی خانەقین کە پێکدێت لە هۆڵی خوێندن و تاقیگەی زانستیی پێشکەوتوو. پرۆژەکە بەبڕی 412 ملیۆن و 500 هەزار دینار جێبەجێدەكرێت.
ڕوونیشیكردەوە، ئەم بڕیارە دوای دیداری بافڵ جەلال تاڵەبانی ھات لەگەڵ نوێنەری خوێندکارانی ناڕازی و پاش خستنەڕووی ئەو داواکارییە، بەڵێنی بە خوێندکارانی بەشی کۆمپیوتەر و تەکنەلۆژیای زانیاریی خانەقین سەر بە زانکۆی گەرمیان دا و ئەمڕۆ بڕیارەکە خرایە بواری جێبەجێکردنەوە.
كەمپەسی خانەقین/ بەشی كۆمپیوتەر و تەكنەلۆژیای زانیاری سەر بە زانکۆی گەرمیان ساڵی 2019 دامەزراوە. کەمپەسەکە تاوەکو ئێستا باڵەخانە و هۆڵ و تاقیگەی گونجاوی نەبووە بۆ خوێندن.
بەپێی ڕاگەیەندراوی نووسینگەكەی، بە بڕیاری بافڵ جەلال تاڵەبانی ڕۆژی چوارشەممە تیمەكانی مەكتەبی ئیدارە و دارایی گشتیی یەکێتی دەستبەکاردەبن و کارەکانی پرۆژەکە لەماوەیەکی کەمدا تەواودەکرێن و دەخرێتە خزمەت خوێندکارانەوە.
