بڕیارە ئەمڕۆ دادگای باڵای فیدراڵی پێداچوونەوە بەو سكاڵایە بكات كە دژ بە پەسەندكردنی كاندیدكردنی هۆشیار زێباری تۆماركراوە و پێشبینی دەكرێت بڕیاری یەكلارەوە سەبارەت بە پەسەندكردنی یان ڕەتكردنەوەی بدات.
پێشتر دادگای باڵای فیدراڵی ئەمڕۆ یەكشەممەی دیاریكرد وەك وادەی دانیشتن دەربارەی ئەو داوایەی دژ بە قبووڵكردنی كاندیدكردنی هۆشیار زێباری بە ژمارە 17 / فیدڕاڵی تۆماركراوە.
ئەمەش پاش ئەوەی یەكشەممەی ڕابردوو ڕێوشوێنەكانی كاندیدكردنەكەی زێباری بۆ پۆستی سەرۆك كۆمار ڕاگرت تا یەكلاكردنەوەی دۆسیەكە.
بڕیارەكەی دادگا بووە هۆی هەڵپەساردنی وتووێژە سیاسییەكانی پەیوەندیدار بە پێكهێنانی كابینەی نوێی حكومەت، دوای ئەوەی فراكسیۆنەكان بڕیاری هەڵپەساردنی بەشداریكردنیان لەو دانیشتنەی پەرلەمان دا كە تایبەت بوو بە هەڵبژاردنی سەرۆك كۆماری نوێ.
چاوەڕوان دەكرێت یەكلاكردنەوەی دۆسیەكە لە دادگا جارێكی دیكە گوڕوتین بە هەوڵە سیاسییەكان بۆ پێكهێنانی كابینەی نوێی حكومەتی عێراق بدات.
ئەحمەد موسەوی، سەركردە و پەرلەمانتاری چێوەی هەماهەنگی ڕایگەیاند، نزیكەی زیاتر لە هەفتەیەكە وتووێژی نێوان هێزە سیاسییەكان دەربارەی قەیرانی پێكهێنانی حكومەت ڕاوەستاوە.
پێشبینی خۆیشی نیشاندا بەوەی بڕیارەكەی ئەمڕۆی دادگا هەرچۆنێك بێت، ببێتە هۆی دەستپێكردنەوەی گفتوگۆكان و گەڕان بەدوای چارەسەر جێگرەوەكاندا.
لەگەڵ ئەوەشدا موسەوی لە لێدوانێكی ڕۆژنامەوانیدا وتی، “لە ئەگەری ڕەزامەندیی دادگا لەسەر كاندیدكرنی زێباری بۆ سەرۆكایەتیی كۆمار، ئەوە مانای قبوڵكردنی لەناو پەرلەمان و دەنگدان پێی ناگەیەنێت، بەهۆی ئەوەی تێبینی زۆر لەسەر ئەو كاندیدكردنە هەیە”.
دووپاتیشیكردەوە، “سووربوونی هەندێك لە لایەنەكان لەسەر تێپەڕاندنی، وامان لێدەكات جارێكی دیكە بایكۆتی دانیشتنەكە بكەین لەگەڵ هاوپەیمانەكانمان، بۆ پەكخستنی ئەو تێپەڕاندنە، بەتایبەت بەهۆی ئەوەی خاوەن یەك لەسەر سێی پەكخەری دانیشتنی هەڵبژاردنی سەرۆكین”.
