شاری ئوری شوێنەواری لە زیقار ئامادەكاری دەكات بۆ پێشوازی لە گەورەترین گەشتی حەجی كریستیانەكان بۆ سەردانكردنی شوێنی لەدایكبوونی پێغەمبەر ئیبراهیم و ئەنجامدانی نوێژی ئیبراهیمی، كە بڕیارە بەمنزیكانە ئەنجامبدرێت.
عامر عەبدولرەزاق، بەڕێوەبەری پشكنەرانی شوێنەوار و كەلەپوری زیقار بە ڕۆژنامەی سەباح-ی ڕاگەیاندووە، لە میانەی سەردانەكەی ئەمدواییەی فوئاد حسێن، وەزیری دەرەوەی عێراق بۆ ڤاتیكان، ڕیمۆ كباڤارینی، سەرۆكی دامەزراوەی گەشتیاری و حەجی كریستیانی ڤاتیكان، لەگەڵ وەزیرە عێراقییەكە ڕێككەوتووە لەسەر ڕێكخستنی ئەم گەشتانە.
وتیشی، “ئەم گەشتە دەبێتە گەورەترین گەشتی حەجی كریستیانەكان لە مێژوودا بۆ ناوچەی ئوری شوێنەواری، كە شوێنی لەدایكبوونی ئیبراهیمی پێغەمبەرە و 13 هەزار حاجی لەخۆدەگرێت، ئامادەسازی دەبێت بۆ گەشتی مانگانەی حاجییە كریستیانەكان”.
بەڕێوەبەرەكەی شوێنەواری زیقار ئەوەشی خستەڕوو، حكومەتی خۆجێیی بەهەماهەنگی لەگەڵ بەڕێوەبەرایەتییەكەیان هەنگاوی گرنگیان ناوە بۆ ئامادەكردنی شاری ئور و ئامادەسازیی ئەم گەشتە و گەشتەكانی دیكە، لەڕێی دەستكردن بە پڕۆژەی پەرەپێدانی ئەو ڕێگا و شەقامانەی دەچنەوە سەر ناوچە شوێنەوارییەكانی دەوروبەر و پلاندانان بۆ دامەزراندنی ناوەندی خزمەتگوزاریی گشتی، وەك هۆڵ، مۆڵ، ئوتێل و شوێنەكانی كاتبەسەربردن.
ئاماژەی بەوەشكرد، گەشتی لەو جۆرە گرنگی گەورەی هەیە لە بوژاندنەوەی دۆخی گەشتیاریی پارێزگاكە، كە گەورەترین ناوچە شوێنەوارییەكانی جیهان لەخۆدەگرێت.
