ئەستێرەی ناودار و دێرینی یانەی تۆتنهام هۆتسپێرز، پیتەر کراوچ لە چاوپێکەوتنێکدا باس لە یادگارییەکی تایبەت دەکات، مێژووەکەی بۆ ڕوبەڕوبوونەوەی نێوان یانەکەیی و یانەی ڕیاڵ مەدرید دەگەڕێتەوە لە ساڵی 2011.
لەم بارەیەوە پیتەر کراوچ لە چاوپێکەوتنێکدا بە دەیلی مەیڵی ڕاگەیاندووە، ” یەکەم کارتی زەرد هەڵەی خۆم بوو بەهۆی لێدانم لە سێرجیۆ ڕامۆس وەرمگرت، بەڵام کارتی دووەم نەخێر..”.
کراوچ دەڵێت، ” کارتی زەردی دووەم بەهۆی لێدانێکەوە بوو لە مارسێلۆ، بەڵام هەرگیز بەرینەکەوتم ئەو بازیدا بۆ ئاسمان و پاشان لەسەر زەوی خۆی تلاندەوە، داوەر منی بە کارتی سوور کردە دەرەوە، ڕاستەوخۆ لە دوای کردنەدەرەوەم بینیم مارسێلۆ لەخۆشیدا بازبازێن و سەما دەکات، زۆر توڕەبووم، دەمویست شەقێکی توندی تێهەڵبدەم، بەڵام هەڵەبووم کە لەکاتی خۆیدا ئەمکارەم نەکرد”.
هێرشبەرە باڵابەرزەکە بەردەوامدەبێت لە گێڕانەوەی سەرگوزەشتەی ئەو یارییە و دەڵێت، ” ژووری جلگۆڕینی یانەکان لە یاریگای سانتیاگۆ بێرنابیۆ ڕاستەوخۆ دەکەوێتە ژێر دانیشتگای هاندەرانەوە، لەوێ دانیشتم و خاولییەکم گرت بە سەرمەوە و خەمباربووم، یەک لەدوای یەک گوێم لە هاندەران دەبوو بە دەنگی بەرز ئاهەنگی تۆمارکردنی گۆڵی دووەم، پاشان سێیەم، پاشان چوارەمیان گێڕا، لەگەڵ هەر هوتافکێشانێکدا من خەفەتم دەخوارد و خۆم بە تاوانبار دەزانی کە یانەکەمم بە دۆڕاندندا، لە کاتێکدا هیچ هەڵەیەکم نەکرد و مارسێلۆ دووچاری کارتی سووری کردم”.
کراوچی تەمەن 39 ساڵ لە ژیانی وەرزشییدا یاری بۆ یانەکانی تۆتنهام، کوینز پارک ڕەینجەرز، پۆرتسماوس، ئەستۆن ڤێلا، نۆرویچ سیتی، ساوزامپتن، لیڤەرپوڵ، ستۆک سیتی و بێرنڵی کردووە، لە نێوان ساڵانی 2005 بۆ 2010 درێسی هەڵبژاردەی ئینگلتەرای لە یارییە نێودەوڵەتیەکاندا پۆشیوە.
