دەزگای لوتکە بۆ کاروباری پەنابەران ئاشکرایکرد، ناسنامەی نۆ تەرمی دۆزراوە لە نوقمبوونی سێ بەلەمەکەی ڕۆژانی 21، 22 و 23ی مانگی کانوونی یەکەمی ساڵی ڕابردوو یەکلاییبوونەتەوە سەرجەمیان کوردن.
لە لێدوانێکدا بۆ تۆڕی میدیایی ئێستا، ئاری جەلال بەرپرسی دەزگای لوتکە ڕایگەیاند، لەو سێ بەلەمەی لە کۆتایی مانگی کانوونی یەکەمی ساڵی ڕابردوودا لە ئاوەکانی یۆنان نوقمبوون، تائێستا تەنها نۆ تەرمیان ناسنامەکانیان یەکلایی بوونەتەوە و سەرجەمیان کورد بوون.
وتیشی، ژمارەیەک تەرمی دیکە دۆزراونەتەوە، بەڵام تائێستا ناسنامەیان یەکلایی نەبووەتەوە و “گومان دەکەین ئەوانیش کوردبن”.
سەبارەت بە هەوڵەكان بۆ دەرخستنی ناسنامەی ئەو تەرمانەی ماون، ئاماژەی بەوەکرد، سامپڵی DNAیان لە کەسوکارەکانیان وەرگرتوون و لەماوەیەکی نزیکدا ڕەوانەی دەکەن بەمەبەستی ناسینەوەیان.
بەرپرسی دەزگای لوتکە سەبارەت بە هێنانەوەی تەرمی نۆ کۆچبەرەکەی دیکە دەڵێت، ”نازانین کەی دەیانگەڕێنینەوە، لەهەوڵداین تەرمە نەناسراوەکانیش یەکلاییبکرێنەوە دواتر تەرمەکان دەگەڕێنرێنەوە”.
بەپێی ئاماری دەزگای لوتکە بۆ کاروباری پەنابەران، لەساڵی 2021دا زیاتر لە 53 هەزار کەس کۆچیانکردووە، کۆی گشتیی قوربانییەکان 88 کۆچبەربوون، کە 45 کۆچبەریان گیانیان لەدەستداوە و 43 کۆچبەریش بێسەروشوێنن.
