ناوەندی هەواڵگریی فیدراسیۆنی پەنابەران ڕاگەیەندراوێكی لەبارەی چارەنووسی ئەو كۆچبەرانە بڵاوكردەوە، كە ئەمشەو لە كەناراوەكانی یۆنان بەلەمەكەیان نوقم بوو.
فیدراسیۆنی پەنابەران بڵاویكردووەتەوە، درەنگانی شەوی ڕابردوو لە نزیک دوورگەی ڤۆلیگاندرۆس-ی یۆنانی بەلەمێکی كۆچبەران ژێرئاوکەوت، دواتر هەڵمەتی ڕزگارکردنیان لەلایەن پۆلیسی ئێشکگری دەریایی یۆنانەوە دەستیپێکردووە.
بەپێی ڕاگەیەندراوەكەی فیدراسیۆنی پەنابەران، تا ئێستا تەنها 12 كۆچبەری بەلەمە نوقمبووەكە ڕزگارکراون.
دەشڵێت، بەرپرسانی دوورگەکە ڕایانگەیاندووە، هۆکاری ژێرئاوکەوتنی بەلەمەکە بەهۆی لەکارکەوتنی بزوێنەرەكەیەوە بووە و بەپێی لێدوانی دوو كۆچبەری ڕزگاركراو، ژمارەیان 50 كۆچبەر بووە.
فیدراسیۆنەكە دووپاتیشیكردەوە، هەڵمەتی گەڕان و ڕزگارکردن بەردەوامە.
پێشتر وا بڵاوكرابووەوە، بەلەمەكە 70 كۆچبەری تێدابووە و زۆربەیان كوردن.
بەپێی هەواڵێكی ئاژانسی هەواڵی ئەسۆشیەیتد پرێس، پاسەوانی دەریاوانیی یۆنان ڕایگەیاندووە، پێدەچێت كۆچبەرە ڕزگاركراوەكان خەڵكی عێراق بن.
