بەپێی سەرژمێرییەكانی ئاژانسی ئۆپتا، گواردیۆلا تاكە ڕاهێنەرە لە مێژووی تۆپی پێدا بە كەمترین یاریی بتوانێت تیپەكەی (مانچستەر سیتی) 500 گۆڵ تۆماربكات.
تیپەكەی گواردیۆلا لە 207 یاریدا توانیویەتی 500 گۆڵ تۆماربكات.
پێشتر ژمارەی پێوانەیی بەناوی یۆرگن كلۆپی ڕاهێنەری لیڤەرپوڵەوە بوو، كە ئەو بە 234 یاریی تیپەكەی توانیبوی 500 گۆڵ بكات.
تۆماركردنی ئەو ژمارەیە پاش ئەوە هات كە مانچستەر سیتی بە حەوت گۆڵی بێ بەرامبەر سەركەوتنی بەسەر لیدز یونایتد بەدەستهێنا.
لەوبارەیەوە گواردیۆلا ئاماژەی بەوەدا، كە ئەوان خاوەنی پێكهاتەیەكی تۆكمە و یاریزانی بەتوانان.
وتیشی، “كوالێتیی یاریزانەكان هۆكاری دروستكردنی ئەو جیاوازییە زۆرە بوو لە یارییەكەی لیدزدا”.
پێپ ئاماژەی بەوەشدا، كە وەرزی ڕابردوو بەرامبەر لیدز، پێنج خاڵیان لەدەستداوە و ئەم وەرزە كاریان بۆ ئەوە كردووە خاڵە لاوازەكانیان چارەسەر بكەن.
