لەدەستدانی کاسیمێرۆ و هازارد بەهۆی توشبوونیان بە ڤایرۆسی کۆرۆنا لەم کاتە هەستیارەی وەرزدا لێدانێکی قورسە لە پێکهاتەی یانەی ڕیاڵ مەدرید، زینەدین زێدانی ڕاهێنەر ناچارە گۆڕانکاری لە پلان و پێکهاتەکانیدا بکات.
ئەمڕۆ و دوای ئەنجامدانی پشکنینی ڕۆتینی یاریزانان، دەرکەوت کە هەریەک لە ئیدین هازاردی بەلجیکی و کاسیمێرۆی بەرازیلی تووشی ڤایرۆسی کۆرۆنا بوون، زێدان ناچاردەبێت بەلایەنی کەمەوە لە 20 ڕۆژی داهاتوودا بۆ پڕکردنەوەی کەلێنە هونەرییەکان پشت بەتواناکانی یاریزانە یەدەگەکان ببەستێت.
ڕۆژنامەی موندۆ دیپۆرتیڤۆی ئیسپانی نوسیویەتی، لەدەستدانی کاسیمێرۆ و هازارد قورسە، بەڵام زێدان دەتوانێت بە چەند شێوەیەک چارەسەر بدۆزێتەوە.
یەکەمیان، بەکارخستنی تۆنی کرۆس یان ڤاڵڤێردی و لە پێشیانەوە مۆدریچ یان ئیسکۆ و مارتن ئۆدیگارد، بەڵام یاریزانە نەرویجیەکە هێندە نابێت گەڕاوەتەوە و بە ئەگەرێکی زۆرەوە بەشداری ڕوبەڕوبوونەوەی شەمشەمە کوێرەکان ناکات.
دووەمیان، گۆڕینی شێوە یاریکردنی ڕیاڵە لە 4-3-3 بۆ 4-2-3-1 و بەکارخستنی ڤینیسیۆز لە پێگەی هازارد، هەروەها داڕشتنەوەی هێڵی ناوەند بە پێی ئامادەباشی و ئەزمونی کرۆس یان مۆدریچ، ڤاڵڤێردی، ئۆدیگارد، ئیسکۆ.
