بە بەشداری وەزیری بەرگریی عێراق، هێزەكانی پێشمەرگە و سوپای عێراق چۆنیەتی پەرەپێدانی زانیاریی زانستی لە ڕووی پڕۆگرامی خوێندن و ئەنجامدانی ڕاهێنانی هاوبەشیان تاوتوێكرد.
بەپێی ڕاگەیەندراوێكی وەزارەتی بەرگریی عێراق، جومعە عیناد، وەزیری بەرگری لە نووسینگەكەی خۆی پێشوازی لە شاندێكی وەزارەتی پێشمەرگە كردووە بە سەرۆكایەتی ڕاگری كۆلێژی ئەركان.
لە دیدارێكدا “چۆنیەتی ئاڵوگۆڕ و پەرەپێدانی زانیاریی زانستی، كە هەریەك لە پرۆگرامی خوێندن و ئەنجامدانی ڕاهێنانی هاوبەش لەنێوان هێزەكانی سوپا و هێزەكانی پێشمەرگە دەگرێتەوە، تاوتوێكراوە”، وەك ئەوە لە ڕاگەیەندراوەكەدا هاتووە.
دەشڵێت، بڕیارە شاندی پێشمەرگە سەردانی سەرۆك ئەركانی سوپا و یاریدەدەری سەرۆك ئەركانی سوپا بۆ ڕاهێنان، زانكۆی بەرگری بۆ خوێندنی سەربازی و هەردوو كۆلێجی ئەركان و فەرماندەیی وەزارەتی بەرگری بكەن.
لەكاتێكی پێشتری ئەمڕۆدا شاندێكی ئەمنیی عێراق گەیشتە مەخمور، بۆ كۆبوونەوە لەگەڵ جەبار یاوەر ئەمینداری گشتیی وەزارەتی پێشمەرگە و بەشێك لە فەرماندەكانی پێشمەرگە.
كۆبوونەوەكە بۆ تاوتوێكردنی پتەوتركردنی ئەو هەماهەنگییانەن كە لە ناوچە كێشەلەسەرەكان و ناوچەكانی بۆشایی ئەمنی، دوای هەڵكشانی هەڕەشەكانی داعش، لەو ناوچانە لەنێوان پێشمەرگە و سوپا هاتوونەتە ئاراوە، لەو نێوەندەشدا قسە هەیە لەبارەی پێكهێنانی لیوای هاوبەش لە نێوان هەردوولا.
ماوەیەكە لە ناوچەكانی نێوان پێشمەرگە و سوپای عێراق، جموجوڵ و هێرشەكانی داعش زیاتربوون و هێرشدەكەنە سەر هێزەكانی پێشمەرگە و هەروەها هێزە فیدراڵییەكان، بۆیە هەولێر و بەغداد چاویان لە هەماهەنگیی زیاترە بۆ پڕكردنەوەی بۆشاییە ئەمنییەكان.
