وتەبێژی فەرماندەی هێزە چەكدارەكان گرتنەبەری ڕێوشوێن بۆ چەسپاندنی ئاسایش لەو ناوچانەی لەبەردەم هەڕەشەی داعشدان ڕادەگەیەنێت، دەڵێت، هەماهەنگیمان لەگەڵ پێشمەرگە هەیە.
لیوا یەحیا ڕەسوڵ، وتەبێژی مستەفا كازمی فەرماندەی گشتیی هێزە چەكدارەكان ڕایگەیاند، هێزە ئەمنییەكان بە دەستی ئاسنین لە هەموو ئەوانە دەدەن كە دەیانەوێت زیان بە ئاسایشی هاوڵاتی بگەیەنن.
وتیشی، “هەماهەنگیی باڵا لەگەڵ هێزەكانی پێشمەرگە هەیە بۆ پاراستنی ناوچەكانی نێوانمان و ڕێگری لە هەوڵی پاشماوەی داعش بۆ تێكدانی دۆخی ئەمنی”، دووپاتیشیكردەوە، “ڕێوشوێنی ئەمنی دەگیرێتەبەر بۆ پاراستنی ئاسایش بە چاوكراوەیی و توانای سەرجەم هێزە چەكدارەكان لە سەرجەم ناوچەكاندا”.
لێدوانەكەی یەحیا ڕەسوڵ لەكاتێكدایە ئەمڕۆ هێزەكانی پێشمەرگە و هێزە ئەمنییەكانی عێراق چوونە ناو گوندی لهێبان، پاش ئەوەی دوێنێ لەلایەن دانیشتووانەكەیەوە چۆڵكرا و شەوی ڕابردووش لەلایەن داعشەوە كۆنتڕۆڵكرا.
