مستەفا كازمی سەرۆك وەزیرانی عێراق، لەلایەن ڤلادیمیر پوتین سەرۆكی ڕوسیاوە بانگهێشتی مۆسكۆ كرا و دەڵێت، “دەمانەوێت پەیوەندییەكانمان لەگەڵ ڕوسیادا بەهێزبكەین”.
نووسینگەی ڕاگەیاندنی سەرۆك وەزیرانی عێراق ڕایگەیاند، ئەمڕۆ سێشەممە مستەفا كازمی پێشوازی لە میخائیل بۆگدانۆڤ، نوێنەری تایبەتی سەرۆكی ڕوسیا بۆ خۆرهەڵاتی ناوەڕاست و ئەفریقا كردووە.
بەپێی ڕاگەیەندراوی نووسینگەكە، كازمی جەختیكردووەتەوە لەوەی ڕۆڵی ڕوسیا لە ناوچەكەدا گرنگە و عێراق خوازیاری هاوكاریی زیاترە لەگەڵ ڕوسیا لە بوارەكانی سیاسی و ئابوریدا، دەیەوێت كاری كۆمپانیاكانی ڕوسیا لە عێراق فراوانتربكرێت و ڕۆڵیان هەبێت لە هەموو كایەكانی وەبەرهێناندا.
نووسینگەی ڕاگەیاندنی سەرۆك وەزیرانی عێراق دەڵێت، بۆگدانۆڤ بانگهێشتنامەكەی ڤلادیمیر پوتین سەرۆكی ڕوسیا بۆ مستەفا كازمی بەمەبەستی سەردانیكردنی مۆسكۆ نوێكردووەتەوە و داوای لە كازمی كردووە سەردانی ڕوسیا بكات، سەرۆك وەزیرانی عێراقیش ڕایگەیاندووە كە بە زووترین كات سەردانەكە ئەنجامدەدات.
