لیژنەی پەروەردە و خوێندنی باڵای پەرلەمانی کوردستان دەڵێت، وەزارەتی دارایی دەسەڵاتی خەرجکردنی دەرماڵەی خوێندکارانی زانکۆ و پەیمانگاکانی لایە، لە ساڵی 2019وە داوای گەڕاندنەوەی لێدەکرێت، بەڵام وەڵامی نەبووە، پێشی وایە دەسەڵاتی خەرجكردن بدرێتە خوێندنی باڵا، دەتوانێت دەرماڵە خەرجبكاتەوە.
شەمۆل ئاشین ئەندامی لیژنەی پەروەردە و خوێندنی باڵای پەرلەمانی کوردستان لە لێدوانێکدا بۆ تۆڕی میدیایی ئێستا وتی، “لەدوای دەستبەکاربوونی لیژنەکەمان لە پەرلەمانی کوردستان لە بەرواری 8/10/2019 داوامان لە وەزارەتی دارایی کرد دەرماڵەی خوێندکارانی زانکۆ و پەیمانگاکان بگەڕێنرێتەوە و هۆکاری بڕینی ئەو دەرماڵەیە ڕوونبکاتەوە، بەڵام تا ئێستاش وەڵامی ئەو داواکارییەمان نەدراوەتەوە”.
پەرلەمانتارەكە جەختیکردەوە، نووسراوی وەزارەتی دارایی سەبارەت بەوەی لە ساڵی 2021دا داواکارییان بۆ خەرجکردنی دەرماڵەی خوێندکاران ئاراستەنەکراوە، “بەداخەوە ڕاست نییە”، بە وتەی ئەو پەرلەمانتارە، ئەوان وەک لیژنەی پەیوەندیدار بەدواداچوونیان کردووە بۆ خەرجکردنی دەرماڵەکە و لەمساڵدا، جگە لەوەی لیژنەی پەروەردە و خوێندنی باڵا داواکارییان ئاراستەکردووە، بەهەمانشێوە وەزارەتی خوێندنی باڵاش ئەو داواکارییەی پێشکەشکردووە.
باسی لەوەشکرد، “دەسەڵاتی خەرجکردنی دەرماڵەی خوێندکاران لای وەزارەتی داراییە، ئەگەر ئەو دەسەڵاتە بدرێتەوە بە وەزیری خوێندنی باڵا، دەتوانێت بە داهاتی وەزارەتەکەی ئەو دەرماڵەیە دابینبکات”.
سەبارەت بە کۆبوونەوەی ئەمڕۆی پەرلەمانی کوردستان، شەمۆل ئاشین وتی، ئەمڕۆ پەرلەمان لیژنەی پەروەردە و خوێندنی باڵای ڕاسپارد بۆ بەدواداچوونی ئەو پرسە و جەختکراوەتەوە لە پاڵپشتیی تەواوی خەرجکردنی دەرماڵەی خوێندکاران.
پێشتریش وەزارەتی خوێندنی باڵا و توێژینەوەی زانستی نووسراوێکی بڵاوکردەوە، کە ئاڕاستەی وەزارەتی دارایی و ئەنجومەنی وەزیرانیان کردووە بۆ خەرجکردنی دەرماڵەی خوێندکاران، بەپێی نووسراوەکە، كە بۆ ساڵی 2019 دەگەڕێتەوە، بڕی پارەی ساڵانەی پێویست بۆ دەرماڵە و یارمەتییەكانی دیكەی زیاتر لە 134 هەزار خوێندکاری زانکۆ و پەیمانگاکان، 35 ملیار دیناری پێویستە.
