ڕێواز فایەق داوا دەكات حكومەتی هەرێم و وەزارەتە پەیوەندییدارەكان داواكاریی خوێندكاران بۆ خەرجكردنەوەی دەرماڵە بكاتە بڕیار.
لە دانیشتنی ئەمڕۆی پەرلەمانی كوردستاندا، دوای خستنەڕووی بەرنامەی كاری دانیشتنەكە، گفتوگۆ لەبارەی خۆپیشاندان و ناڕەزایەتییكانی خوێندكاران بۆ خەرجكردنەوەی دەرماڵە دروستبوو، بەو پێیەی پێشتر یاداشت درابوو بە سەرۆكایەتیی پەرلەمان بۆ گفتوگۆكردن لەسەر ئەو پرسە.
ڕێواز فایەق سەرۆكی پەرلەمانی كوردستان، جگە لە سەركۆنەكردنی توندوتیژییەكانی لە خۆپیشاندانەكاندا دروستبوو، داوای لە هەردوو وەزارەتی دارایی و خوێندنی باڵا كرد هەماهەنگی بكەن بۆ ئەوەی داواكاریی خوێندكاران بخەنە بەردەم ئەنجومەنی وەزیران.
سەرۆكی پەرلەمانی كوردستان داوایكرد، داواكاریی ڕەوای خوێندكاران بۆ گەڕاندنەوەی دەرماڵە لە ئەنجومەنی وەزیرانەوە بكرێتە بڕیار.
بڕیاریشدرا یاداشت بۆ حكومەتی هەرێمی كوردستان بنێردرێت و هەریەك لە وەزیرانی دارایی و خوێندنی باڵا بانگێشتی دانیشتنێكی پەرلەمان بكرێت و گفتوگۆ لەبارەی پرسەكەوە بكەن.
داواكەی ڕێواز فایەق سەرۆكی پەرلەمانی كوردستان بۆ ئەوەی حكومەت گەڕاندنەوەی دەرماڵەی خوێندكاران بكاتە بڕیار لەكاتێكدایە بڕیارە ئەمڕۆ ئەنجومەنی وەزیرانی هەرێمی كوردستان لەبارەی هەمان پرس كۆببێتەوە.
