تۆڕی کۆمەڵایەتیی فەیسبووک بەشێکی تەرخانکردووە بۆ ڕووداوی تەقینەوەکەی شەوی رابردووی سلێمانی، کە بەشێکە لە پلاتفۆرمەکەدا تایبەتە بە وەڵامدانەوەی قەیرانەکان.
فەیسبووک ئەو بەشەی لە پلاتفۆرمەکەیدا بەمەبستی بەدەمەوەچوونی قەیرانەکان و قوربانییەکان دروستکردووە، کە زیاتر ئامانج لێی ئاگادارکردنەوەی کەسانی دیکەیە لە تەندروستی و پێداویستییەکانی ئەوانەی لەناو قەیرانەکاندان.
خزمەتگوزارییەکە بەوجۆرەیە کە ئەوانەی لەو ڕووداو و قەیرانانەدان دەتوانن لەڕێگەی “safety chek”ـەوە کەسانی دیکە لە دۆخی خۆیان ئاگاداربکەنەوە و ئاگایان لە دۆخی هاوڕێکانیشیان بێت.
شەوی ڕابردوو لە گەڕەکی کازیوەی شاری سلێمانی بەهۆی تەقینەوەی غازی سیستمی شوفاژەوە خانوویەکی سێ نهۆمی بەتەواوی ڕووخا، لە رووداوەکەدا 15 کەس گیانیان لەدەستدا و 12 کەسیش برینداربوون.
