جارێكی دیكە له به‌شێكی وڵاتانی جیهان به هۆكارێكی نادیار هه‌ریه‌ك له تۆڕه كۆمه‌ڵایه‌تییەكانی فه‌یسبوك، ئینستگرام و ماسنجه‌ر له‌كاركه‌وتن.
ماڵپه‌ڕی “داون دیتێكته‌ر” بڵاویكردەوە، شەوی ڕابردوو تۆڕی كۆمه‌ڵایه‌تیی فه‌یسبووك، ئینستگرام و ماسنجه‌ر لە چەند وڵاتێك لەكاركەوتووە و تا ئێستاش هۆكاره‌كه‌ی نادیاره.
ئاماژەی بەوەشكردووە، له‌كاركه‌وتنی ئەو تۆڕانە به‌شێكی زۆری وڵاتانی گرته‌وە، وەكو بەریتانیا، ئەڵمانیا، ئەمریكا و ژمارەیەك وڵاتی دیكە، بەڵام تا ئێستا كۆمپانیای “مێتا” كه خاوه‌ندارێتی ئه‌و تۆڕانه ده‌كات، هیچ ڕوونكردنه‌وه‌یه‌كی له‌بارەی هۆكارەكەی بڵاونه‌كردووه‌ته‌وه.
لەماوەی ڕابردووشدا به‌هۆكارێكی نادیار هه‌ردوو تۆڕی كۆمه‌ڵایه‌تیی فه‌یسبووك و ئینستگرام له‌گه‌ڵ وه‌تسئه‌پ له‌كاركه‌وتن .
ئەو تۆڕانە كە لەلایەن كۆمپانیای “مێتا”وە خاوەندارێتی دەكرێت و دامەزرێنەرەكەی مارك زوكەربێرگە، تووشی چەندین گرفت و قەیران بووەتەوە، بەتایبەت گرفتی یاسایی و هەروەها هێرشی ئەلیكترۆنی، لە چەند ڕۆژی ڕابردووش ناوی كۆمپانیاكە لە “فەیسبووك”ــەوە گۆڕدرا بە “مێتا”.
