بەشی کەلەپوور و تیپی هونەری میللیی سلێمانی بە بانگهێشتی فەرمی بەشداری لە فێستیڤاڵی کەلتووریی ئەرمینیادا کرد.
فێستیڤاڵەکە لە سەرەتای ئەم مانگەدا لە ئەرمینیا بە بەشداریی چەندین وڵاتی جیهان بەڕێوەچووە، و ئەمڕۆ بەڕێوەبەرایەتی ڕۆشنبیریی سلێمانی ڕایگەیاندووە، لە فێستیڤاڵەکەدا نوێنەرانی وڵاتان بە چەند چالاکییەک گوزارشتیان لە کەلتوور و پۆشاكی كەلەپووریی وڵاتەكانیان کرد.
لەو بارەیەوە میدیا ڕەئوف قادر، بەڕێوەبەری بەشی کەلەپوور و تیپی هونەری میللیی سلێمانی ڕایگەیاند، “بەشداریی ئێمە چ وەکو کورد چ وەکو بەشەکەمان گرنگی و سەنگ و قورسایی هەبوو لە فێستیڤاڵەکەدا، گرنگی هەبوو لەڕووی ئاڵوگۆڕی ڕۆشنبیری و هونەری و کەلتووری و ئاشنابوون و ناساندنی کەلتوور و فەرهەنگی کورد بە گەلانی دونیا”.
ئاماژەی بەوەشکردووە، “بەپێی وتەی لیژنە و سەرۆکی فێستیڤاڵ ئێمە وەکو کورد و وەکو تیپەکەمان باشترین نمایشمان پێشکەشکرد و جیاوازبووین لە تیپ و نەتەوەکانی تر”.
