كارلۆ ئەنچلۆتی پێش یارییەكەی ئەمشەوی چامپیۆنز لیگ بەرامبەر شیریف تیراسبۆل، تیپی بەرامبەر بە “ڕێكخراو” وەسفدەكات، بۆیە بە پێویستی دەزانێت “تەركیزی تەواو” بكەن، ڕەتیشیكردەوە بە زیدان بەراورد بكرێت.
ئەمشەو لە چامپیۆنز لیگ، ڕیال مەدرید ڕووبەڕووی شیریف تیراسبۆل دەبێتەوە، كارلۆ ئەنچلۆتی ڕاهێنەری ریاڵ مەدرید بەشداری كۆنفرانسی ڕۆژنامەوانیی پێش یارییەكەی كرد.
ئەنچلۆتی ئاماژەی بەوەدا، كە ڕكابەرەكەیان تیپێكی ڕێكخراو و بەهێزە و پێویستە لەسەرەتاوە تەركیز بكەن.
وتیشی، “چامپیۆنز لیگ بۆ ئێمە بۆنەیەكی جیاوازە و مێژووێكی دێرینمان هەیە لەگەڵیدا”، بۆیە جەختی لەوە كردەوە كە ئامانجیان ئەوەیە ڕكابەرێكی بەهێزی پاڵەوانێتییەكە بن.
لەكۆتایی قسەكانیدا ئەنچلۆتی ڕەتیكردەوە بە زیدان بەراوردی بكەن، باسی لەوە كرد كە زیدان توانیویەتی بە پێكهاتەكەی بەردەستی، سێ ناسناوی چامپیۆنز لیگ بەدەستبهێنێت.
