وەزیری دارایی فەرەنسا، برونۆ لومێر، ئەمڕۆ سێشەممە 21 تەمموز، ڕایگەیاند وەبەرهێنانی کۆمپانیای هواوێی چینی لە وڵاتەکەیان قەدەغە ناکەن.
وەزیرە فەرەنسییەکە لە چاوپێکەوتنەکەی ڕایگەیاند، “ئێمە وەبەرهێنانی 5Gی چین لە وڵاتەکەمان قەدەغە ناکەین، لە فەرەنسا جیاوازی لەگەڵ هیچ لایەنێکی جێبەجێکاردا ناکرێت”.
بە وتەی لومێر، “ئەورووپا گەمژە نییە. ئێمە بەرژەوەندییە ستراتیجییەکانمان دەپارێزین، واتە ئێمە لەو لایەنانە دەڕوانین کە هەستیارن و ڕێزیش لە ئاسایشی نەتەوەییمان دەگرین، پێمان وایە چینی هاوبەشمان دەتوانێت لە هەڵوێستی فەرەنسا تێبگات، کە هەڵوێستێکی ڕوون و هاوسەنگە”.
ڕۆژی 14ی تەمموز، سەرۆکوەزیرانی بەریتانیا، بۆریس جۆنسن بڕیاریدا بە قەدەغەکردنی بەرهەمەکانی هواوێی لە تۆڕی 5Gی وڵاتەکە، سەرەڕای ئەوەی تاوەکو ساڵی 2027، هەموو بەرهەمەکانی کۆمپانیا چینییەکە لە بەریتانیا ناهێڵدرێت.
