نرخی نەوت لە بازاڕەكانی جیهاندا لە سەروو 75 دۆلارەوە مایەوە، زۆربەی پێشبینییەكان بەئاراستەی بەرزبوونەوەی زیاتری نرخەكەن.
نرخی نەوتی خاو لە بازاڕەکانی جیهاندا ماوەی نزیكەی دوو هەفتەیە بەردەوام ڕوو لە بەرزبوونەوەیە، ئەمڕۆ پێنجشەممە لەگەڵ كردنەوەی بازاڕەكاندا جارێكی دیكە نرخەكەی بەزربوونەوەی تۆماركرد، یەك بەرمیل نەوتی برێنت بە نزیكەی 75.30 دۆلار مامەڵەی پێوەكرا.
هاوشێوەی برێنت، نرخی بەرمیلێک نەوتی خاوی تەکساسیش بەرزبووەوە و بە نزیكەی 73.20 دۆلار مامەڵەی پێوەكرا.
بەگشتی پێشبینییەكان بۆ نرخی نەوت و بازاڕی وزە بە ئاڕاستەی بەردەوامیی بەرزبوونەوەی نرخی نەوتن، بەتایبەت بەهۆی زیاتربوونی خواست لەسەر وزە و دووبارە دەستپێكردنەوەی جموجوڵەكان لە وڵاتانی ئەوروپا، ئەمریكا و ئاسیا بەگشتی.
