جێگری سەرۆک کۆماری ئێران ڕایگەیاند، لایەنی پەیوەندیداریان ئاگادار کردووەتەوە بۆ هەڵوەشاندنەوە و هەڵگرتنی ڤیزا بۆ خاوەن پاسپۆرتە ئاساییە عێراقییەکان.
ئیسحاق جیهانگیری، جێگری سەرۆک کۆماری ئێران لە لێدوانێکی ڕۆژنامەوانیدا ڕایگەیاند، “وەک بڕیاردرابوو ڤیزا بۆ خاوەن پاسپۆرتە ئاساییەکانی عێراق هەڵبگیرێت و پێویستیان بە ڤیزا نەبێت لە کاتی سەردانی وڵاتی ئێران”.
چوارشەممەی ڕابردوو حکومەتی ئێران کۆمەڵێک بڕیاری لەبارەی سەردانیکردنی هاوڵاتییانی عێراقەوە بۆ وڵاتەکەی دەرکرد و ئاشکرایکرد، “لە ئەگەری ڕازیبوونی عێراق بۆ هەڵگرتنی ڤیزا ئەو وڵاتە ئامادەیە ڤیزا بۆ هاوڵاتییە عێراقییەکان هەڵبگرێت”.
پێشتر چەندجارێک هەڵگرتنی ڤیزا لە نێوان ئێران و عێراقدا ڕویداوە و ئێران دەیەوێت بە هەڵوەشاندنەوەی ڤیزا بۆ عێراقییەکان سودی زیاتر لە کەرتی گەشتیاری وڵاتەکەی وەرگرێت، بەهەمان شێوە گەشتیارە ئاینییەکانی ئێران بۆ عێراق سودی ئابوریان دەبێت.
