كەمێك بەر لە ئێستا لە سنووری هەولێر پاڵاوگەیەكی نەوت ئاگریگرت و تیمەكانی بەرگریی شارستانیش لە هەوڵی كۆنتڕۆڵكردنیدان.
بەپێی زانیارییەكانی پەیامنێری تۆڕی میدیایی ئێستا لە هەولێر، لە یەكێك لە كۆگاكانی پاڵاوگەی كۆچەر-ی سەر بە ناحیەی شەمامكی سەر بە سنووری پارێزگای هەولێر ئاگر كەوتووەتەوە.
ئاماژەی بەوەشكردووە، تیمەكانی بەرگریی شارستانیی هەولێر لەئێستادا لە شوێنی ڕووداوەكەن و هەوڵەكانیان بۆ كۆنتڕۆڵكردنی ئاگرەكە دەستپێكردووە؛ تا ئێستاش هۆكاری كەوتنەوەی ئەو ئاگرە ئاشكرانەكراوە.
ئەمە یەكەم ڕووداوی كەوتنەوەی ئاگر نییە لە هەولێر و دوو ڕۆژ بەر لە ئێستاش لەسەر ڕێگەی هەولێر–كەركوك، ئاگرێكی گەورە لە كۆگایەكی ڕۆنی ئۆتۆمبێل كەوتووەتەوە بەهۆیەوە زەرەر و زیانێكی زۆری بەدوای خۆیدا هێنا.
