ئەمڕۆ لەلایەن رێکخراوی نەتەوە یەکگرتووەکانەوە بە رۆژی جیهانیی شاخ دەستنیشانکراوە.
هۆکاری دیاریکردنی رۆژەکە بۆ جەخت خستنەسەر ئەو رۆڵەیە کە شاخەکان گێڕاویانە بە درێژایی مێژوو لە پاراستنی مرۆڤ و ژیانکردنیان.
ئەمساڵ نەتەوە یەکگرتووەکان جەخت لە سەهۆڵبەندانی شاخەکان دەکاتەوە و دەڵێت، سەهۆڵبەندانەکان تەنیا دیمەنی بەستوو نین، بەڵکو ئەوان سەرچاوەیەکی سەرەکیی ئاوی شیرینن لە ئاستی جیهانیدا.
دەشڵێت، خێرابوونی رێژەی توانەوەیان تەنیا قەیرانێکی ژینگەیی نییە، بەڵکو قەیرانێکی مرۆییشە و مەترسی لەسەر کشتوکاڵ و وزەی پاک و ئاسایشی ئاو و ژیانی ملیارەها کەس دروستدەکات.
نەتەوە یەکگرتووەکان داوای گرتنەبەری رێوشوێنی بەپەلە دەکات بۆ رێگری لە توانەوەی سەهۆڵبەندانەکان کە بەهۆی گەرمبوونی زەوی و گۆڕانی کەشوهەواوە توانەوەیان خێرابووە.
