زریان و باو و بۆرانی وێرانکەر، چەند رۆژێکە ئیسپانیای گرتووەتەوە و بەهۆیەوە تا ئێستا لانیکەم 158 کەس گیانیان لەدەستداوە.
تیمەکان سەرقاڵی دۆزینەوەی رزگاربووانن لە زۆرینەی ناوچەکانی وڵات و زیاتر لە هەزار و 200 ئەندامی تیمی فریاگوزاری لە چالاکییەکانی گەڕاندا بەشدارییان هەیە.
پیدرۆ سانچێز، سەرۆک وەزیرانی ئیسپانیا سەردانی چەند خێوەتێکی رزگاربووانی کرد لە وڵاتدا و لەویش رایگەیاند، گرنگترین شت کە بیکەین رزگارکردنی ژیانی هاوڵاتییانمانە.
لە سەرەتای ئەم هەفتەیەوە بارانبارینی بەخوڕ و بای بەهێز باشوور و رۆژهەڵاتی ئیسپانیای گرتووەتەوە و بەهۆیەوە لافاوێکی کوشندە لە ڤالێنسیا و ناوچەی ئەندەلوس لە باشووری ئەو وڵاتە دروستبووە.
بەهۆی لافاوەکەوە گەشتە شەمەندەفەرەکان بۆ شارەکانی مەدرید و بەرشەلۆنە هەڵوەشایەوە و قوتابخانەکان راگیران و خزمەتگوزارییە سەرەتاییەکان لە زۆرترین ناوچە زیانلێکەوتووەکان وەستان.
تیمەکانی فریاگوزاری داوا لە هاوڵاتییان دەکات خۆیان لە گەشتکردن بە رێگای وشکانی بەدووربگرن و بەدواداچوون بۆ هەر هەواڵێکی نوێ بکەن کە لە لایەن سەرچاوە رەسمییەکانەوە دەربچێت.
دەستەی کەشناسی لە ڤالێنسیا حاڵەتی زۆرترین ئامادەباشی راگەیاند و ئاستی ئاوی باران لە ناوچەکانی وەک تۆرێس و هۆتێل گەیشتووەتە 200 ملم.
