وتەبێژی وەزارەتی بازرگانیی عێراق رایگەیاند، لە هەموو پارێزگاکان کۆگای خۆراکمان هەیە و هیچ کێشەیەکی بەشەخۆراک لە عێراق بوونی نییە و ئارد و سەبەتە خۆراکەکان لە کۆگاکاندان و هیچ قەیرانێکی خۆراک بوونی نییە.
محەمەد حەنون، وتەبێژی وەزارەتی بازرگانیی عێراق لە میانەی بەشداریکردنی لە بەرنامەیەکی تەلەفزیۆنیدا رایگەیاند، پڕۆگرامی دابەشکردنی خۆراک لە هەموو عێراق وەک یەکە و ساڵانە 10 بەشەخۆراک بە هاوڵاتییان دەدرێت.
باسی لەوەشکرد، دابەشکردنی 10 بەشەخۆراکی ساڵانە بەشێکە لە بودجە و ئەوانەی چاودێری کۆمەڵایەتی دەیانگرێتەوە، بەشەخۆراکی زیاتر وەردەگرن لە هاوڵاتییانی دیکە.
ئاماژەی بەوەشکرد، هەماهەنگی باش هەیە لەگەڵ وەزارەتی بازرگانیی هەرێمی کوردستان و هەموو کۆگاکان لە عێراق وەک یەک بەشەخۆراکیان بۆ دەنێردرێت.
لەبارەی زیادبوونی چەند ماددەیەکی خۆراکی بۆ بەشەخۆراک رایگەیاند، ئەوانەی ناویان لە چاودێری کۆمەڵایەتی تۆمارکراوە، 10 ماددەی خۆراکی لەگەڵ ئارد وەردەگرن و ئەوان ساڵانە 12 بەشەخۆراکیان پێدەدرێت.
ئەوانەی دیکە کە هاوڵاتییانی ئاساین و سەر بە چاودێری کۆمەڵایەتی نین، شەش ماددەی خۆراکی لەگەڵ ئارد وەردەگرن بە قسەی وتەبێژی وەزارەتی بازرگانیی عێراق.
