سەرۆك كۆماری ئێران لە دەفتەی یاداشتەكانی مەزاری سەرۆك كۆماری كۆچكردووی عێراقدا نووسیویەتی، رێز لە فیداکاریی و چالاکییەکانی ئەم گەورە پیاوە دەگرین.
مەسعود پزیشکیان، سەرۆک کۆماری ئێران لەسەر مەزاری سەرۆك مام جەلال لە دەفتەری یاداشتەکاندا، یاداشتێکی نووسی و تیایدا هاتووە، “لەسەر مەزاری جەلال تاڵەبانی خۆشەویست و بەڕێز فاتیحا بخوێنین و سڵاو لە رۆحی بڵند و دیدی کراوە و روانینی قوڵی ئەم خۆشەویستە دەکەین”.
پزیشكیان ئەوەشی نووسیوە، “رێز لە فیداکاریی و چالاکییەکانی ئەم گەورە پیاوە لە پێش شۆڕش و تا پاش شۆڕش بە ئامانجی گەیشتن بە سەربەخۆیی و ئازادیی خاکە خۆشەویستەکەی و هەوڵە بێکۆتاکانی بۆ بەدیهێنانی یەکگرتوویی و یەکڕیزی لە ناوخۆی وڵات و باوەڕی بە هاوکاریی لەگەڵ ئێرانی خۆشەویست، دەگرین”.
نیوەڕۆی ئەمڕۆ سەرۆك كۆماری ئێران گەیشتە سلێمانی و لە فڕۆكەخانە لەلایەن بافڵ جەلال تاڵەبانی، سەرۆكی یەكێتیی نیشتمانیی كوردستان پێشوازی لێكرا.
پاشان بەرەو مەزاری سەرۆك مام جەلال بەڕێكەوت، بەر لەوەی لە دەباشان لەگەڵ سەرۆكی یەكێتی كۆببێتەوە.
