تۆمەتبارێك كە تەقەی لە سێ كەس كردبوو، لە لایەن مەفرەزەكانی بنكەی پۆلیسی عەربەتەوە دەستگیركرا.
بەڕێوەبەرایەتیی پۆلیسی پارێزگای سلێمانی، لە راگەیەندراوێکدا بڵاویکردەوە، دوای ئەوەی لە لایەن سەنتەری فریاكەوتنی سلێمانییەوە مەفرەزەكانی بنكەی پۆلیسی عەربەت ئاگاداركرانەوە لە رووداوێكی تەقەكردن لە گوندی باریكە، دەستبەجێ مەفرەزەكانی پۆلیس گەیشتنە شوێنی رووداوەكە و دەركەوت لەلایەن تۆمەتبارێكەوە تەقە لە سێ كەس كراوە.
لە راگەیەندراوەکەی پۆلیسی سلێمانیدا هاتووە، دوای گەیاندنی بریندارەكان بۆ نەخۆشخانە هێزەكانی پۆلیس لێكۆڵینەوە و بەدواداچوونەكانیان دەستپێكرد و دوای وەرگرتنی بڕیاری دادوەر توانرا تۆمەتبار بدۆزرێتەوە و دەستگیربكرێت.
پۆلیسی سلێمانی دەڵێت، لەكاتی دەستگیركردنیدا دەستگیرا بەسەر چەكێكی جۆری دەمانچە كە بە تۆمەتبار بووە، و ئێستا تۆمەتبار بە بڕیاری دادوەر و بەپێی ماددەی 405-31 لە یاسای سزادانی عێراقی راگیراوە.
