وەزارەتی بازرگانیی عێراق رایگەیاند، کەشتییەکی پڕ لە برنجی تایلاندی هاتووەتە ناو سنووری ئاویی وڵاتەوە و بەشێکە لە دابینکردنی برنجی بەشەخۆراک.
لوما هاشم موسەوی، بەڕێوەبەری گشتیی کۆمپانیای بازرگانیی عێراق رایگەیاند، کەشتی MG Av . NEKTARIOS گەیشتووەتە عێراق و 40.5 تۆن برنجی تایلاندی هەڵگرتووە کە بەشێکە لە دابینکردنی بەشەخۆراک.
ئاماژەی بەوەشکردووە، پشکنەرانی تاقیگەیی لە ئوم قەسر بە هاوکاری ستافی بەشی کۆنترۆڵی جۆری، نمونەکانیان وەرگرتووە بەمەبەستی ئەنجامدانی پشکنینی سەرەتایی لەسەریان و دواتر رەوانەی تاقیگەی ناوەندی کۆمپانیاکەیان کرد، بۆ ئەنجامدانی پشکنینی تاقیگەیی و دڵنیابوون لە جۆری تایبەتمەندییە ستانداردەکان.
ئەگەر لە ئەنجامی پشکنینەکان دەرکەوت کە مادەکە گونجاوە و لەگەڵ تایبەتمەندییەکان دەگونجێت، ئەوا مادەکە بەسەر لقەکانی کۆمپانیاکەدا دابەش دەکرێت بەپێی ئەو پلانەی بەبازاڕکردنەی ئامادەکراوە بۆ دابەشکردنی لەنێوان بریکارەکان و دواتر بۆ دابەشکردنی بەسەر هاوڵاتییاندا.
