وتەبێژی وەزارەتی تەندروستیی عێراق رایدەگەیەنێت، ژمارەی تووشبووانی تای خوێنبەربوون بۆ 19 کەس بەرزبووەوە.
د. سەیف بەدر، وتەبێژی وەزارەتی تەندروستیی عێراق رایگەیاند، پێنج حاڵەتی نوێی تووشبوون بە تای خوێنبەربوون تۆماركراون و بەمەش كۆی ژمارەی تووشبووانی تای خوێنبەربوون لەماوەی ئەمساڵدا، بەرزبووەوە بۆ 19 کەس، كە دووانیان گیانیانلەدەستداوە.
وتیشی، ریزبەندیی ئەو ناوچانەی لە ماوەی ئەمساڵدا حاڵەتی تای خوێنبەربوون تێیاندا تۆماركراون، بەمشێوەیەی خوارەوەیە:
زیقار/ حەوت حاڵەت.
کەرکوک/ چوار حاڵەت.
موسەننا/ سێ حاڵەت.
نەینەوا/ یەک حاڵەت.
بەسڕە/ یەک حاڵەی.
بەغداد/ یەک حاڵەت.
میسان/ یەک حاڵەت.
واست/ یەک حاڵەت.
تای خوێنبەربوون، نەخۆشییەكی ڤایرۆسییە و لە ئاژەڵەوە بۆ مرۆڤ دەگوازرێتەوە؛ بەپێی راپۆرتێکى رێكخراوی تەندروستیی جیهانی، %40ـی ئەو كەسانەی توشی دەبن، گیانلەدەستدەدەن.
ئەو نیشانانەی کە رەنگە ببنە مەترسی لەسەر ژیان بریتین لە (خوێنبەربوون لە ژێر پێست، لە ئەندامەکانی ناوەوەی لەش، یان لە دەم، چاو و گوێ، هەروەها تێکچوونی کارکردنی کۆئەندامی دەمار، کۆما، هێڵنج، لەکارکەوتنی گورچیلە یان جگەر، کێشەی هەناسەدان).
