دەرهێنەری درامای گەردەلول رایگەیاند، بەشێک لەکارەکانی بەشی نوێی دراماکە لەسەر گەرمیان و شاڵاوی ئەنفال دەبێت.
لە میانەی سەردانێکی ستاف و دەرهێنەری درامای گەردەلول بۆ ناوچەی گەرمیان لەلایەن سەرپەرشتیاریی ئەو ئیدارەیەوە پێشوازیان لێکرا و جەلیل زەنگەنە، دەرهێنەری دراماکە ئاماژەی بەوە کرد، ”ئامادەکارییەکانیان بۆ دەستپێکردنی بەشی چوارەم و پێنجەمی درامای گەردەلول دەستپێکردووە”.
ئەوەشی ئاشکراکرد، ”بەشێک لەکارەکانیان لەسەر گەرمیان و شاڵاوی ئەنفال دەبێت و داواشیکرد ئیدارەی گەرمیان و دامودەزگاکانی سنوورەکە هاوکاریان بێت”.
لەو بارەیەوە جەلال شێخ نوری، سەرپەرشتیاریی ئیدارەی گەرمیان جەختیلەوە کردەوە، ئیدارەی گەرمیان و دامودەزگاکانی حکومەت لە سنوورەکە، هاوکار و پشتیوانی ستافی دراماکە دەبێت بۆئەوەی بتوانن سەرکەوتووانە کارەکانیان ئەنجام بدەن.
