توێژینەوەیەک بەو دەرئەنجامە گەیشتووە، ئەو کەسانەی هەفتانە دوو تا سێ جار وەرزش ئەنجامدەدەن، کەمتر توشی ئەو دۆخە دەبن کە مرۆڤ هەست دەکات تێرخەو نەبووە و کاریگەری باشی دەبێت لەسەر کێشەکانی خەو بە شێوەیەکی گشتی.
ئەنجامدانی وەرزش و جوڵەی رۆژانە کاریگەری باش و بەرچاوی دەبێت لەسەر جەستە بەشێوەیەکی گشتیی، دڵ و ماسولکە و دۆخی دەرونی مرۆڤ و کەمکردنەوەی مەترسییەکانی مەرگی پێشوەختە.
ژمارەیەک توێژەری زانکۆی رێکیافیک لە ئایسلاند بەو دەرئەنجامە گەیشتوون، کێشەکانی خەو بەشێکیان پەیوەندیدارن بە دڵ و سووری خوێنەوە و هەندێکیشیان پەیوەندییان بە دۆخە دەرونییەکانەوە هەیە.
دەرئەنجامی توێژینەوەکە دەریخستووە ئەو کەسانەی وەرزشیان ئەنجامداوە بەشێوەیەکی رێکوپێک خەوتوون و ئەوانەی وەرزشیان ئەنجامنەداوە کەمتر لە شەش کاتژمێر خەوتوون لەکاتێدا هەر مرۆڤێک دەبێت لە 7 بۆ 9 کاتژمێر بخەوێت لە شەو و رۆژێکدا.
