وەزیری بازرگانیی عێراق رایگەیاند، هەڵمەتێک بۆ خستنەبازاڕی بڕی زیاتری گۆشت و مریشک و هێلکە رادەگەیەنن لە مانگی رەمەزاندا.
ئەمڕۆ یەکشەممە، داود غەریری وەزیری بازرگانیی عێراق رایگەیاند، هەڵمەتێکی گەورە دەستپێدەکەن بۆ دابینکردنی گۆشت و مریشک و هێلکە بۆ بازاڕ بە نرخێکی کێبڕکێکاری و کەمتر لە بازاڕ لە سەرجەم پارێزگاکانی وڵات وەک ئامادەکارییەک بۆ مانگی رەمەزان.
وەزیری بازرگانی جەختی لەوە کردەوە، چەندین دەروازەی بەبازاڕکردن دەکەنەوە لەمانگی رەمەزاندا، بۆ دروستکردنی هاوسەنگیی و کۆنترۆڵکردنی نرخی ماددە خۆراکییەکان لە بازاڕە ناوخۆییەکاندا.
راشیگەیاندووە، هەڵمەتەکە لە سەرەتای مانگی ئازاری داهاتووەتەوە دەستپێدەکات و بازنەی هەڵمەتەکانی چاودێریکردنی بازاڕ فراوان دەکرێن و رێوشوێنی توند بەرامبەر بەو کەسانەی دەستکاری نرخی خۆراک دەکەن دەگیرێتە بەر لەگەڵ رێکارەکانی وەزارەت لە مانگی رەمەزاندا.
