بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیی لە یان برێم، كونسوڵی نوێی فەرەنسا لە هەرێمی كوردستان كرد.
لەدیدارێكدا كە نزار ئامێدی، ئەندامی مەكتەبی سیاسی ئامادەبوو، دوایین پێشهات و گۆڕانكارییە سیاسییەكانی هەرێم و عێراق گفتوگۆیان لەبارەوەكرا و جەخت لە هەماهەنگی و هاریكاریی نێوان هێز و لایەنە سیاسییەكان كرایەوە بە ئامانجی پاراستنی ئاشتی، سەقامگیری و رووبەڕووبوونەوەی ئاڵنگارییەكان.
لەدرێژەی دیدارەكەدا سەرۆك بافڵ وێڕای پیرۆزبایی دەستبەكاربوون و دووپاتكردنەوەی پشتگیریی یەكێتی بۆ سەرخستنی ئەركەكەی و پەرەپێدانی پەیوەندییەكانی نێوان هەردوولا، هەڵوێستی یەكێتی لەبارەی رووداو و گۆڕانكارییەكان روونكردەوە و رایگەیاند، “زاڵبوون بەسەر كێشەكان و كۆتاییهێنان بە ناكۆكییەكان بە تایبەت كێشەكانی نێوان هەولێر و بەغداد، پەیوەستە بە گفتوگۆ، لێكتێگەیشتن و پابەندبوون بە دەستوورەوە، ئەمەش رێگا دروستەكەیە و لەماوەی رابردوودا پەیڕەومان كردووە لەپێناو بەدەستهێنانی شایستەداراییەكانی هەرێم و دوورخستنەوەی ژیان و گوزەرانی خەڵك لە ململانێكانەوە”.
